६ असार २०७८, आईतवार
  • हाम्रो बारेमा
  • विज्ञापन

कोरोना रोकथाम र नियन्त्रणमा सरकार जिम्मेवार बनेन- कांग्रेस

प्रकाशित मिति :  २२ जेष्ठ २०७८, शनिबार १४:१०


काठमाडाैं । नेपाली कांग्रेसका उपसभापति विमलेन्द्र निधिले पार्टीले क्रियाशील सदस्यतालाई चाँडो टुंग्याएर १४ औँ महाधिवेशन गर्नुपर्ने बताउनुभएको छ  ।

कांग्रेस काठमाडौंस्थित जिल्ला सम्पर्क समितिद्धारा आज यहाँ आयोजित ‘वर्तमान संकटमा  काँग्रेसको भूमिका’ विषयक भर्चुअल सम्वाद कार्यक्रममा उहाँले अब पार्टीका सबैतहले महाधिवेशनमा आफ्नो ध्यान केन्द्रित गर्नुपर्छ भन्नुभयो ।

‘आठ लाख हाराहारीमा क्रियाशिल सदस्यता पार्टी केन्द्रीय कार्यालयमा दर्ता भइसकेको छ, दर्ता हुन बाँकी रहेका क्रियाशिल सदस्यता पनि चाँडो टुंग्याएर समयमा नै महाधिवेशन गर्नुपर्छ,’ उहाँले भन्नुभयो । पूर्व उपप्रधानमन्त्री निधिले  काँग्रेसले संविधानको धारा ७६ (५) अनुसार प्रधानमन्त्रीमा दावी गरेको बताउनुभयो ।

कांग्रेस केन्द्रीय सदस्य अर्जुननरसिंह केसीले कोरोनाको नियन्त्रणमा सरकारले पूर्वतयारी गर्न नसक्दा  भयावह अवस्था आएको आरोप लगाउनुभयो ।  अर्का केन्द्रीय सदस्य दिलेन्द्रप्रसाद वडुले कोरोना संक्रमणको रोकथाम र नियन्त्रणमा सरकार जिम्मेवार बन्न नसकेको बताउनुभयो ।

कांग्रेस केन्द्रीय सदस्य पुष्पा भुसालले कांग्रेसको १४ औँ महाधिवेशन समयमा नै सम्पन्न गर्नुपर्ने बताउनुभयो । कांग्रेस नुवाकोटका सभापति जगदीश्वरनरसिंह केसी, काभ्रेपलाञ्चोकका सभापति मधु आचार्य, रोल्पाका सभापति अमरसिंह पुनलगायतले पार्टीको विधानअनुसार समयमा नै महाधिवेशन गर्नका लागि केन्द्रीय नेतृत्व अगाडि बढ्नुपर्नेमा जोड दिनुभएको थियो ।

–रासस



प्रतिक्रिया दिनुहोस !