४ असार २०७८, शुक्रबार
  • हाम्रो बारेमा
  • विज्ञापन

नागढुंगा सुरुङमार्गमा काम गर्ने ३२ कामदारलाई काेभिड संक्रमण

प्रकाशित मिति :  १२ जेष्ठ २०७८, बुधबार १०:१९


काठमाडौं । नागढुंगास्थित सुरुङमार्ग निर्माणस्थलभित्र रहेका ३२ जनामा कोभिड संक्रमण देखिएको छ । निर्माणस्थलभित्र रहेर काम गर्दै आएका एक जापानीसहित नेपालीमा संक्रमण पुष्टि भएको हो । संक्रमित भएकालाई अरूबाट छुट्टै (आइसोलेशन क्याम्प) मा राखेर अरू नियमित काम गरिरहेको नागढुंगा सुरुङमार्ग आयोजनाले जनाएको छ ।

संक्रमितमध्ये अहिलेसम्म एकलाई अस्पताल लगिएको भए पनि अरू सबै निर्माणस्थलमा रहेको छुट्टै क्याम्पमा रहेको आयोजना प्रमुख नरेशमान शाक्यले बताउनुभयो । उहाँले भन्नुभयो, ‘अस्पताल जानुभएका व्यक्ति पनि ठीक भइसक्नुभएको छ ।’

नेपालमा दोस्रो भेरियन्टसहितको संक्रमण सुरु भएसँगै जिल्ला प्रशासन कार्यालयले काठमाडौं उपत्यकामा तीन साता पहिले निषेधाज्ञा लागू गरेको थियो । निषेधाज्ञामा पनि क्याम्पमा बसेर गर्न सकिने विकास निर्माणलाई निरन्तरता दिइने सरकारको निर्णयका आधारमा सो सुरुङमार्गको निर्माण सामान्य अवस्थामा जसरी नै पुनः सञ्चालन थियो । देशभर संक्रमण फैलिरहेकाले आवश्यक स्वास्थ्य सुरक्षा अपनाएर निर्माण अघि बढाउँदै आइएको आयोजनाले जनाएको छ । आयोजनाले क्याम्पभित्र कुनै व्यक्तिमा सङ्क्रमण देखिइहालेमा तुरुन्त अरूबाट छुट्टाएर राखिने व्यवस्था मिलाएको छ । उहाँले भन्नुभयो, ‘संक्रमित भएका व्यक्तिको स्वास्थ्यमा समस्या आइहालेमा अस्पताल लगिनेछ ।’

क्याम्पभित्र संक्रमित देखिएसँगै यहाँ कार्यरत कामदार निर्माणस्थल छाड्न थालेको आयोजनाले जनाएको छ । अघिल्लो सातासम्म ६ सय भन्दा बढी कार्यरत रहेकामा अहिले यहाँ तीन सय छन् । झण्डै आधा कामदार निर्माणस्थल छाडिसकेको प्रमुख शाक्यले बताउनुभयो । तत्काल भएकै कामदारबाट निर्माणलाई निरन्तरता दिइने उहाँले  बताउनुभयो ।

निर्माणस्थलमा सङ्क्रमण नियन्त्रण गर्न सकियो भने यही रूपमा काम अघि बढाइने आयोजनाले जनाएको छ । अझै फैलिएर गयो भने निर्माणस्थल बन्द गरिने प्रमुख शाक्यले बताउनुभयो । अहिलेसम्म निर्माणस्थलभित्र व्यवस्थापन गर्न सकिने अवस्था भएकाले काम भइरहेको उहाँले बताउनुभयो ।

अबको केही समयसम्म कम सङ्ख्यामा कामदार राखेर काम गरिनेछ । यो समयमा ‘पर्ख र हेर’ गरेर त्यसपछि अवस्था हेरेर अघि बढिने उहाँले बताउनुभयो । काम प्रगतिका नाममा स्वास्थ्य सुरक्षासँग चुनौती नगरिने उहाँको भनाइ छ । उहाँले भन्नुभयो, ‘अझै धेरै सङ्ख्यामा सङ्क्रमित हुँदा काम गर्न रोकिनेछ ।’

अहिले आयोजनाले कुनै पनि व्यक्तिलाई संक्रमणको शंक लाग्नासाथ कोभिड जाँच गराउने गरेको छ । सुपरिवेक्षण गर्नेलाई भित्रै बस्ने व्यवस्था मिलाइएको प्रमुख शाक्यले बताउनुभयो । आवश्यक संख्यामा जनशक्ति भित्रै रहेकाले सचेत भएर काम गरिरहेको उहाँले बताउनुभयो । कामदारको मनमा त्रास भएकै कारण आधाले काम छाडेर फर्किसकेका छन् । पछिल्लो अवस्थामा जतिसक्दो काम अघि बढाएर आठ–१० दिन पछि निर्माणस्थलको अवस्था हेरेर निर्णय गरिने उहाँले बताउनुभयो ।

उहाँका अनुसार निर्माणस्थलको स्थिति नियन्त्रणमा राख्ने प्रयास गरिएको छ । उहाँले भन्नुभयो, ‘अब कोभिड फैलन क्रम कम भएमा त्यसका आधारमा अघि बढिनेछ, संक्रमण अझै फैलिएमा काम रोक्नुपर्छ ।’

संक्रमणकै कारण अहिले आयोजनाको पूर्वतर्फ अवरोध पुगेको आयोजनाले जनाएको छ । सुरुङमार्गमा काम भने भइरहेको छ । मुख्य सुरुङमा अहिले पनि दुई चरणमा गरी चौबिसै घण्टा काम भइरहेको प्रमुख शाक्यले बताउनुभयो । सहायक सुरुङमा दिनमा काम भए पनि रातको समयमा काम रोकिएको छ । पूर्वपट्टि पहुँच मार्ग बनाउने काम रोकिएको र पश्चिमतर्फ काम भइरहेको आयोजनाले जनाएको छ ।

जापान सरकारको ‘सफ्ट लोन’ मा ४२ महिनामा सो सुरुङको निर्माण सम्पन्न गर्ने गरी नेपाल सरकार र जापानी निर्माण संस्था हाजमा आंदाे कर्पोरेशनबीच सम्झौता भएको थियो । सुरुङमार्ग सञ्चालनमा आएसँगै नागढुंगा–नौबिसे सडकखण्डमा दैनिकरूपमा हुने जाम हट्ने अपेक्षा गरिएको छ ।

सुरुङमार्ग खन्दा आएका मजबुत ढुंगा र माटो त्यहीँ निर्माणका क्रममा प्रयोग हुने बताइएको छ । कमजोर ढुंगा र माटोलाई भने सिस्नेखोलामा भरेर सोही स्थानमा ‘सर्भिस सेन्टर’ निर्माण गरिनेछ । सो स्थानमा बसपार्क, तरकारी संकलन केन्द्रलगायत स्टल हुने बताइएको छ ।

–रासस



प्रतिक्रिया दिनुहोस !