९ श्रावण २०७८, शनिबार
  • हाम्रो बारेमा
  • विज्ञापन

इराकको कोभिड अस्पतालमा आगलागी, कम्तीमा २३ जनाको ज्यान गयाे

प्रकाशित मिति :  १२ बैशाख २०७८, आईतवार ०७:३९


बग्दाद ।  इराकको राजधानी बग्दादस्थित इबन अल–खातिभ अस्ततालको कोभिड सघन उपचार कक्षमा आइतबार भएको आगलागीमा परेर कम्तीमा २३ जना बिरामीको ज्यान गएको छ ।

स्वास्थ्य अधिकारीहरुका अनुसार अक्सिजन सिलिन्डर बिस्फोटबाट आगलागी शुरु भएको थियो । उक्त अस्पतालमा अग्निनियन्त्रणको व्यवस्था नभएका कारण अस्पतालभित्रका प्रज्वलनशील अरु सामानहरुमा आगो तत्कालै सल्किएको थियो ।

दशकौंदेखिको द्वन्द्व र थोरै लगानीका कारण इराकी अस्पतालहरुको अवस्था अत्यन्त दयनीय छ । अस्पतालहरुमा औषधि र शैयाको पनि अभाव छ ।

उक्त दुर्घटना लगत्तै सामाजिक संजालमा तिब्र आक्रोश व्यक्त भएको छ । प्रधानमन्त्रीले आगलागीको कारणका बारेमा अनुसन्धान गर्न आदेश दिनु भएको छ ।

आगलागी हुँदा उक्त अस्पतालमा कोभिड–१९ का सख्त बिरामी ३० जनालाई राखिएको थियो ।

मध्यरातमा आगलागी भएलगत्तै अग्निनियन्त्रकहरु अस्पताल पुगेका थिए । अस्पतालमा कार्यरत कर्मचारी र बिरामी एवं आफन्तहरु भागभाग गरेका दृश्यहरु सामाजिक संजालमा पोष्ट गरिएका थिए ।

अस्पतालको प्रशासनका अनुसार अधिकांश बिरामीलाई अन्यत्र सार्नु परेको र भेन्टिलेटर हटाउँदा बिरामीको ज्यान गएको हो । कतिपयको धुँवाले निस्सासिएर ज्यान गएको थियो ।

अस्पतालबाट एक सय २० जना बिरामी र उनीहरुका आफन्तमध्ये ९० जनालाई सुरक्षित रुपमा बाहिर निकालिएको छ । तर कम्तीमा ५० जनालाई आगोले पोलेको छ ।

इराकमा बुधबार कोभिड–१९ का बिरामीको संख्या १० लाख नाघेको छ । यो अरब मुलुकमै सबैभन्दा बढी हो ।

इराकी स्वास्थ्य मन्त्रालयले गत फेब्रुअरी ०२० मा पहिलो संक्रमण देखिएयता हालसम्म १५ हजार दुई सय १७ जनाको ज्यान गएको जनाएको छ । करिब चार करोड जनसंख्या रहेको इराकमा हाल दैनिक ४० हजारको स्वास्थ्य परीक्षण गरिरहेको पनि मन्त्रालयले बताएको छ ।

मन्त्रालयका अनुसार इराकका कम्तीमा दुई लाख ७५ हजार व्यक्तिले पहिलो डोज खोप लगाएका छन् ।

– रासस



प्रतिक्रिया दिनुहोस !