४ असार २०७८, शुक्रबार
  • हाम्रो बारेमा
  • विज्ञापन

राम-सीतालाई देवघाटमा भव्य स्वागत

प्रकाशित मिति :  ७ बैशाख २०७८, मंगलवार १२:२०


काठमाडौं । राम-सीता रथयात्रा तनहुँ र चितवनको संगम स्थल देवघाट पुगेको छ ।

राम-सीता रथ यात्रालाई मंगलबार साँझ देवघाटमा बाजागाजासहित भव्य स्वागत गरिएको छ । राम-सीतालाई स्वागत गर्न र हेर्न देवघाटमा हजारौंको संख्यामा स्थानीय उपस्थित भएका छन् । ठाउँमा-ठाउँमा जय श्री राम लेखेका व्यानर समातेर सामाजिक दूरी कायम गर्दै स्थानीयले स्वागत गरेका छन् ।

धर्मगुरुहरुले पनि राम-सीतालाई भव्य स्वागत गर्नुभएको छ ।

मंगलबार बिहान प्रधानमन्त्री केपी शर्मा ओलीले बालुवाटारबाट वैदिक विधिअनुसार रथयात्रासहित राम, सीता, लक्ष्मण र हनुमानको प्रतिमालाई विदा गर्नुभएको थियो ।

राम, लक्ष्मण, सीता र हनुमानका प्रतिमा बेग्लाबेग्लै रथमा राखेर लावालस्कर सहित देवघाट पुर्‍याइएको हो । रथयात्रा देवघाट लैजाने क्रममा धादिङ चितवन लगायत सडकमा  ठाउँठाउँमा स्थानीयले स्वागत गरेका थिए ।

रथयात्रामा संस्कृति पर्यटन तथा नागरिक उड्डयनमन्त्री भानुभक्त ढकाल, पर्यटन सचिव यादवप्रसाद कोइराला र पशुपति विकास कोषका सचिव प्रदीप ढकाल लगायत सरकारका उच्च अधिकारी सहभागी हुनुहुन्छ ।

सो रथयात्रा आज देवघाटमै बस्नेछ । सो रथयात्रा भगवान रामको जन्मथलो चितवको माडीस्थित अयोध्यामा बुधबार मात्र पुग्नेछ ।  राम नवमीको अवसर पारेर बुधबार राम, सीता, लक्ष्मण र हुनमानको प्रतिमा स्थापना गरिनेछ । माडीको वडा नम्बर ८ र ९ मा पर्ने अयोध्यामा निर्माण भएको राम मन्दिरमा  राम, सीता, लक्ष्मण र हुनमानको प्रतिमा स्थापना गरिनेछ । प्रतिमा स्थापना गरेपछि अयोध्यामा बुधबार विशेष कार्यक्रम गरिनेछ ।

-आइएनए न्युज एजेन्सी



प्रतिक्रिया दिनुहोस !