२९ असार २०८१, शनिबार
  • हाम्रो बारेमा
  • विज्ञापन

अपाङ्गता भएका दश जनालाई उन्नत जातका बाख्रा वितरण

प्रकाशित मिति :  १९ असार २०८१, बुधबार १८:२५


तनहुँ । जिल्लाको घिरिङ गाउँपालिकाद्वारा ‘ग’ र ‘घ’ वर्गका १० जना अपाङ्गता भएका व्यक्तिलाई बीउपुँजीका रूपमा उन्नत जातका बाख्रा वितरण गरेको छ ।

गाउँपालिका मातहत रहेका पाँच वटा वडाबाट दुई/दुई जनाका दरले छानिएकालाई जनही एउटा बोयर जातको बाख्रा वितरण गरिएको हो । अपाङ्गता भएका व्यक्तिलाई स्वरोजगार बनाइ आयआर्जनमा सघाउ पुर्याउने उद्देश्यले बाख्रा वितरण गरिएका स्थानीय अपाङ्गता समन्वय समितिका सदस्य सचिव हिरामान श्रेष्ठले जानकारी दिनुभयो ।

उहाँका अनुसार घिरिङ गाउँपालिका–१ बाट तुलसी कुमाल, विष्णु परियार, वडा नं २ बाट पदम थापा, सोमबहादुर दमाईं, वडा नं ३ बाट सुकमाया सार्की, मनकुमारी श्रेष्ठ, वडा नं ४ बाट भुरेली कुमाल, सुकमाया कुमाल र वडा नं ५ बाट उमा थापा र ऋतिक श्रेष्ठलाई बाख्रा वितरण गरिएको हो । क र ख वर्गका अपाङ्गता भएका व्यक्तिले राज्यबाट मासिक भत्ता पाइरहेका छन् । राज्यबाट औपचारिक रूपमा नियमित सुविधा नपाउने ग र घ वर्गका व्यक्तिलाई चालु आर्थिक वर्षदेखि गाउँपालिकाले आयआर्जनमा सघाउ पुग्नेगरी कार्यक्रम अगाडि बढाएको हो, सदस्य सचिव श्रेष्ठले भन्नुभयो ।

गाउँपालिकाभित्र दुई सय ८२ जनाले विभिन्न किसिमका अपाङ्गता परिचयपत्र लिइसकेका छन् । ग वर्गका ४९ र घ वर्गका १४ गरी ६२ जना मध्यम र सामान्य किसिमका अपाङ्गता भएका अपाङ्गता समन्वय समिति सदस्य कृष्णप्रसाद अधिकारीले जानकारी दिनुभयो । गाउँपालिकाले उदाहरणीय काम सुरु गरेको छ, यसबाट अपाङ्गता भएका व्यक्तिले राहत महसुस गरेका छौँ, हामीमा थप उत्साह मिलेको छ, उहाँले बताउनुभयो ।

गाउँपालिका अध्यक्ष होमबहादुर थापाले शारीरिक रूपमा अशक्त व्यक्तिको जीवनस्तर उकास्न पालिकाले सहयोग गरिरहेका बताउनुभयो । मध्यम र सामान्य गरी ६२ जना अपाङ्गता भएका व्यक्तिको निःशुल्क स्वास्थ्य बीमा गर्न गाउँपालिकाले प्रक्रिया अगाडि बढाएको उहाँले जनाकारी दिनुभयो ।

 

 

 

-रासस


339
Shares

प्रतिक्रिया दिनुहोस !