टंक आङबुहाङको सांसद पद रिक्त गर्न माओवादीको पत्र
काठमाडौं । प्रदेश १ का आर्थिक मामिला तथा योजना मन्त्री टंक आङबुहाङको सांसद पद रिक्त हुने भएको छ ।
आज नेकपा माओवादी केन्द्रले प्रदेशसभा सचिवालयमा मन्त्री आङबुहाङको पद रिक्त गर्न पत्राचार गरिसकेको छ । आङबुहाङले दल त्याग गरेको सूचना पदेशसभा सचिवालयमा साढे १० बजे पेश गरिएको संसदीय दलका नेता इन्द्र आङबोले जानकारी दिनुभएको हो ।
आङ्बुहाङलाई माओवादी केन्द्रले सोधेको स्पष्टिकरणको जवाफ नदिएकाले प्रदेश सभा सदस्य नरहेको जानकारी सचिवालयलाई गराइएको आङबोले बताउनुभयो ।
माओवादी केन्द्रबाट निर्वाचित ताप्लेजुङका प्रदेशसभा सदस्य आङ्बुहाङ एमाले प्रवेश गरेर एमालेको केन्द्रीय सदस्य बनिसक्नुभएको छ । साबिक नेकपा विभाजनकै बेला उहाँले प्रचण्डको साथ छाडेर केपी ओली पक्षमा लाग्नुभएको थियो ।
राजनीतिक दल सम्बन्धी ऐन अनुसार सांसदले अर्को दल प्रवेश गरेमा पद रिक्त हुने व्यवस्था छ । आङबुहाङको पद रिक्त भएमा निर्वाचन आयोगले कारबाहीमा परेका सांसदको स्थानमा छ महिनाभित्र निर्वाचन गराउनुपर्छ ।
-आईएनए न्युज एजेन्सी
